पुणे, {प्रभात वृत्तसेवा} – महापालिकेकडून १९७० पासून दिली जाणारी ४० टक्के कर सवलत शहरातील निवासी मिळकतींना दिली जात होती. मात्र, राज्य शासनाच्या आदेशामुळे २०१९ पासून आजपर्यंत तब्बल ४ लाख ६३ हजार १८९ पुणेकरांची ही सवलत रद्द झाली असून त्यांना लाखभर रूपयांच्या थकबाकीची बिले पालिकेकडून पाठविण्यात आली आहेत.
याबाबत, नागरिकांकडून मोठ्या प्रमाणात तक्रारी आल्याने महापालिकेकडून आता घरोघरी जाऊन या सवलीचे अर्ज भरून घेतले जाणार आहेत. यासाठीचे काम मंगळवार (दि.१८) पासून सुरू करण्यात आल्याचे कर संकलन विभागाचे उपायुक्त माधव जगताप यांनी सांगितले.
या शिवाय, ज्या मिळकतींची सवलत रद्द झाली आहे. त्यांची यादीही पालिकेकडून संकेतस्थळावर दर्शविण्यात येणार आहे. पीटी-३ अर्ज भरण्याची मुदत पालिकेकडून १५ आॅगस्ट २०२४ पर्यंत वाढविण्यात आली असल्याचेही जगताप यांना स्पष्ट केले.
घरीच भरून घेणार पीटी-३ अर्ज…
महापालिकेकडून या मोहीमे अंतर्गत शहरातील ३ लाख ७२ हजार ४४० मिळकतींचे घरोघरी जाऊन सर्वेक्षण करण्यात येणार आहे. मागील वर्षी ४० टक्के सवलतीचा वाद वाढल्यानंतर शासनाने ही सवलत कायम ठेवण्यास महापालिकेस मुभा दिली. त्यानुसार, नागरिकांनी पीटी-३ अर्ज सादर करण्याचे आवाहन पालिकेने केले होते.
मात्र, केवळ ९० हजार नागरिकांंनीच हे अर्ज भरून दिले त्यामुळे, महापालिकेकडून त्यांना सवलत देण्याबाबत काम सुरू आहे. मात्र, उर्वरीत ३ लाख ७२ हजार नागरिकांंनी अर्ज भरून दिलेले नाहीत. या नागरिकांच्या घरी महापालिकेचे कर्मचारी भेट देणार आहेत.
तसेच, जागेवर त्यांच्याकडून अर्ज भरून घेणार असून अर्जासोबत २५ रूपये प्रशासकीय शुल्क असणार आहे. नागरिकांना स्वत: राहत असल्याचा पुरावा म्हणून गॅस कनेक्शन, आधार कार्ड, मतदान कार्ड, पासपोर्ट, वाहन परवाना, सोसायटी ना हरकत प्रमाणपत्र द्यावे लागणार आहे.
– जीआयएस सर्वेनंतर सवलत रद्द केलेल्या मिळकती – ९६ हजार ११२
– २०१९ नंतर नव्याने बांधकाम झालेल्या मिळकती – १ लाख ९८ हजार २९६
– समाविष्ट २३ गावातील सवलत न मिळालेल्या मिळकती – १ लाख ६८ हजार ७७१